19/06/17

Prezi dos Contos no mundo!

E nesta semana final de curso, traemos este marabilloso Prezi dos Contos no mundo elaborado pola profesora de Matemáticas Nieves Lomba.

Desfrutade con esta presentación de todos os países que fomos visitando ao longo do ano, desde o Brasil a Portugal pasando por Suecia, México ou Australia!

http://prezi.com/r-zzzycjoufo/?utm_campaign=share&utm_medium=copy&rc=ex0share


24/04/17

E logo chegamos ao terceiro trimestre

E logo chegamos ao terceiro trimestre. Parece que foi onte cando comezamos, e xa logo acabamos o curso! E neste terceiro trimestre continuaremos traballando desde a Biblioteca con moitas máis actividades: de novo os Contos do mundo en colaboración co CEIP A Sangriña. Tamén temos por diante o mes das Letras Galegas, con varias actividades arredor da figura de Carlos Casares, pero tamén de Agustín Fernández Paz, ao que queremos honrar pola súa grande contribución á nosa literatura. Xa vos iremos informando de todas as actividades!

E non esquezades, vémonos tamén no Instagram, podedes agregarnos na conta Bibliotrega!

Estas últimas semanas continuamos cos Contos do mundo, e liscamos esta vez a Suecia, da man de Rafael Adalid e os rapaces e rapazas de 4º de primaria. Tedes toda a información da actividade no blogue do CEIP: http://bibliopepinho.blogspot.com.es/2017/04/contos-do-mundo-suecia.html

E en breve... moito máis, non deixedes de vir buscar libros á biblioteca, eles precisan saír, e vós sacalos a pasear! ;)


27/03/17

Relatea, concurso de contos!

O centro San Xerome, en colaboración coa biblioteca do noso instituto, está a levar a cabo o concurso literario Relatea.
O alumnado que quixer participar, pode ir deixando os seus contos, escritos en galego ou castelán, nunha caixa de correo habilitada para tal fin na entrada da biblioteca. O xurado de San Xerome, composto por usuarias e usuarios deste centro, revisa cada mércores todos estes relatos e vai seleccionando os mellores. Ao final de curso coñeceremos o nome das persoas ganadoras, que ademais serán premiadas! Así que animádevos a participar, que desta volta hai agasallos!

20/03/17

Italia, Exipto, Cuba, Groenlandia, India... na última semana percorremos o mundo!

Na última semana foi un non parar no proxecto Contos do mundo en colaboración co CEIP A Sangriña.

Así, visitamos inicialmente Cuba e Exipto. Á illa caribeña fomos da man de Marisa Guerra e o alumnado de primeiro de Bacharelato e 5º de primaria. Polos desertos de Exipto levounos Juanra Torres, xunto co alumnado de 2º da ESO B, e até representaron unha pequena peza teatral, Una momia muy responsable!
Podedes consultar toads as fotos aquí: http://bibliopepinho.blogspot.com.es/2017/03/contos-do-mundo-cuba-e-exipto.html





Despois desta viaxe achegámonos á terra da pizza, os xeados e a pasta, Italia! Alá fomos con Menchu e o alumnado de 1º da ESO e de 4 anos do CEIP. E de novo cunha peza teatral, Os tres porquiños en Venecia. Transportámonos por uns intres á terra dos canais! Máis información aquí: http://bibliopepinho.blogspot.com.es/2017/03/contos-do-mundo-italia.html



Para morrer co frío fomos ás terras de Groenlandia, con Carme Díaz e Nuria Vázquez e o alumnado de 2º da ESO, para ler dous contos fantásticos e pensar sobre as condicións de vida en terras tan afastadas e xeadas. Toda unha experiencia! http://bibliopepinho.blogspot.com.es/2017/03/contos-do-mundo-os-polos.html


Finalmente fomos a un dos lugares máis poboados do mundo, á India, da man de Neves Rodríguez e o alumnado de 2º da ESO e 6º de primaria. O conto que levamos ao CEIP foi Filemón o engurrado, de Michael Ende, todo un clásico! http://bibliopepinho.blogspot.com.es/2017/03/contos-do-mundo-india.html


13/03/17

De Australia... a Groenlandia!

Nas últimas semanas continuamos co proxecto Contos do mundo, en colaboración co CEIP A Sangriña. Estivemos en Australia, da man de Menchu Costa e dos rapaces e rapazas de 1ºB, e agora pasamos á fría Groenlandia, con Carme Pernas e o alumnado de 2º da ESO B.

Nas seguintes imaxes podedes apreciar a actividade sobre Australia, pero, coma sempre, podedes consultar moito máis polo miúdo a actividade no blogue do CEIP: http://bibliopepinho.blogspot.com.es/2017/02/contos-do-mundo-australia.html



Ademais, non esquezades continuar votando polas vosas revistas favoritas (tendes a enquisa na conserxería!), da Semana da Prensa. O taboleiro podédelo consultar agora ao carón da porta de orientación.

06/03/17

Benvidas/os á Semana da Prensa! Xa podedes votar todas/os!

Este luns día 6 de marzo comeza a Semana da Prensa. Con este motivo, a Biblioteca do IES A Sangriña puxo a andar este proxecto de selección de revistas. Desde hoxe tedes na entrada do instituto o seguinte taboleiro, en que podedes ver as portadas dun total de 32 revistas, de todos os ámbitos. Entre elas, todas e todos podedes votar por un total de 5, solicitando a folla para o facer na conserxería.

As máis votadas serán seleccionadas para a súa compra no instituto, para que as poidades consultar na nosa biblioteca cada día!

Tedes de prazo toda a semana!

Veña, a participardes todas e todos!


20/02/17

Viaxamos do Brasil a Australia... en Contos do mundo!


Que tal rapaces/as!

Unha semana máis preto do entroido, xa se albiscan os disfraces e xa van cheirando as orellas e as filloas!

E mentres tanto, nós continuamos co proxecto Contos do mundo, e pasamos do Brasil a Australia, desta volta da man da profesora Menchu, do Departamento de galego, que irá ler varios contos co alumnado do CEIP A Sangriña esta semana.

Na pasada, foron María, de Grego, Alfredo, de Música, e Denis, de Lingua Castelá, achegar os seus contos e a súa música brasileira. Se queredes botarlle unha ollada e ver como resultou a actividade, coma sempre, tendes toda a información, videos e fotografías no blogue da biblioteca do CEIP: http://bibliopepinho.blogspot.com.es/2017/02/contos-do-mundo-viaxamos-brasil.html


No próximo mes de marzo anunciaremos tamén máis actividades, como a semana da prensa, que terá lugar no noso instituto con algunha nova actividade. E non esquezades, este venres é o Día de Rosalía, e haberá recitado e representación de poemas e música, moita música!


10/02/17

Os contos do mundo percorren a lusofonía: Portugal, Macau e Brasil



Ola a todas/os!

Nestas dúas últimas semanas continuamos cos Contos do mundo, en colaboración co CEIP A Sangriña. A experiencia está sendo marabillosa, tanto para o alumnado e profesorado do noso IES, como tamén para as e os cativos da escola.

A semana pasada o conto que se traballou co alumnado foi O macaco do rabo cortado, para o que contamos coa representación teatral dos rapaces e rapazas estudantes de portugués de 1º de Bacharelato. Podedes consultar os videos da representación no seguinte link, do blogue da biblioteca do CEIP: http://bibliopepinho.blogspot.com.es/2017/02/contos-do-mundo-viaxamos-portugal.html

E esta semana o proxecto continuou con máis actividades, neste caso homenaxeando aos nosos compañeiros/as lingüísticos de Macau, na China, para o que se contou de novo con Alberto Viso, con María José Carneiro e con Isabel Gonçalves, a nosa querida lectora de portugués, ademais de Carlos Alonso, o director do noso instituto, que quixo coñecer de primeira man o proxecto. Podedes consultar os videos aquí: http://bibliopepinho.blogspot.com.es/2017/02/seguimos-traballando-na-pdi-viaxamos.html

E a semana próxima seguimos! Desta volta co Brasil, da man de Alfredo Garrido, que levará o alumnado de 3º da ESO tocar música popular brasileira, e Denis Vicente, que presentará brevemente o país e contará un conto popular da terra carioca.





30/01/17

Novas actividades esta semana na Sangriña!

Boas rapaces/as! Como vai indo o trimestre? De aquí a pouco comezamos xa febreiro, tempada de entroido, orellas e filloas, pero tamén dos primeiros parciais... Moito ánimo con eles!

Nestas semanas na Biblioteca da Sangriña seguimos cun ritmo incesante. A semana pasada a conferencia de presentación de Crónica Córnica foi todo un éxito. Tivemos un debate moi interesante sobre o coñecemento e uso das linguas, sobre identidade, sobre o Brasil, sobre o feito de ser escritor na sociedade actual... pouco máis puidemos pedir! E nesta semana que comeza, temos mais dúas actividades, que con certeza van ser tamén moi moi produtivas.

-Martes 31 de xaneiro ás 09:10: presentación de El secreto del espejo, de Ana Alcolea. Actividade organizada polo Clube de Lectura, e enfocada especialmente para o alumnado de 1º e 2º da ESO.



-Xoves 2 de febreiro ás 10:15 lectura e representación de O macaco do rabo cortado co alumnado de 1º de Bacharelato C no CEIP A Sangriña. Esta actividade, organizada pola Biblioteca e a Comisión de Normalización Lingüística, contará coa presenza do profesor de portugués Alberto Viso e fai parte do ciclo Contos do Mundo, a través do cal todo este curso o alumnado do IES A Sangriña está indo ao noso centro veciño contarlles contos de diferentes partes do planeta aos máis cativos. Neste caso, o país ao que se fai referencia é Portugal. 

Esperemos que disfrutedes destas actividades! Coma sempre, podedes enviar as vosas propostas a través de comentarios neste blogue ou falando con calquera dos profesores/as que habitualmente estamos na Biblioteca.


23/01/17

Presentación de Crónica Córnica, de Francisco Coimbra, este mércores na Sangriña

O próximo mércores 25 de xaneiro terá lugar no Salón de Actos do IES A Sangriña a presentación de Crónica Córnica, de Francisco Coimbra. A actividade desenvolverase entre as 12:20 e as 14:00 e será de carácter obrigatorio para todo o alumnado de 1º e 2º de Bacharelato.

Ademais de presentar a obra, o autor, investigador da Universidade do Paraná (Brasil), dará a coñecer entre o noso alumnado a situación dos estudos galegos no Brasil e na súa universidade, así como as causas do interese que pola nosa lingua hai alén mar. 











Francisco Coimbra (Madrid, 1986), galego por adopción, pasou varias tempadas en Santiago de Compostela e Ourense durante os anos en que estudou Filoloxía Románica. Máis tarde trasladouse ao Brasil, onde actualmente traballa como profesor no Departamento de Linguas Estranxeiras Modernas da Universidade Federal do Paraná, na cidade de Curitiba. Publicou artigos nos eidos da lingüística, a tradución e os Estudos Culturais en revistas especializadas do Brasil, a Arxentina, México, España e Colombia. Así como varios poemas e un conto na Revista de Estudos Galegos da UCM “Madrygal”. Estréase agora na narrativa con “Crónica Córnica”, finalista do Premio Xerais 2016.

Sinopse da obra:

Inexplicabelmente o condado de Cornualle, na illa de Gran Bretaña, esperta unha fría mañá de xoves ou de venres falando unha lingua extinta: o córnico. A partir dese feito, desenvólvese unha trama atractiva, escrita cun estilo poderoso, que supón unha profunda reflexión sobre a identidade e a represión lingüística, ambientada na Gran Bretaña de hoxe. “Crónica Córnica” é unha novela que sorprende e destila amor polas palabras e as linguas en cada páxina, abordando un tema tan crucial como escasamente tratado na literatura. A novela, de tintura saramaguiana, técese a través dun personaxe colectivo que se encarna en secretarias, profesoras, alcaldes, mariñeiros, carteiras, pallasos, libreiros e xardineiras: toda unha composición polifónica que adopta as formas do relatorio e da crónica onde, por veces, é máis importante o non dito, o diálogo imaxinario, do que a voz directamente expresada. Unha novela contemporánea, que pode ser lida en moitas claves, que pivota sobre a tríade lingua, identidade e sociedade, e foi enunciada non desde o discurso científico, senón desde a fabulación murmurada de boca a orella. Un intenso e metafórico berro literario a favor das linguas e contra a marxinación e as desigualdades económicas, culturais e sociais entre colectivos e pobos.